Run Lola Run (German , 1998)

 Director: Tom Tykwer

         

വളരെ "brilliant " ആയ ചിത്രം എന്ന് വിളിക്കാന്‍ കഴിയുന്ന അനുഭവമാണ് Run Lola Run . കഥ തുടങ്ങുന്നത് ഒരു ഫോണ്‍ വിളിയില്‍ നിന്നാണ്. ഫോണിന്‍റെ  മറുതലയ്ക്കല്‍ Lola യുടെ കാമുകന്‍ ഒരു പ്രതിസന്ധിയില്‍ ആണ്. ഒരു മയക്കു മരുന്ന് കച്ചവട ഗ്രൂപ്പില്‍ പ്രവര്‍ത്തിക്കുന്ന അയാളുടെ കൈയില്‍ നിന്നും വലിയൊരു തുക നഷ്ടപ്പെടുന്നു. ഇരുപത് മിനിട്ടിനുള്ളില്‍ ആ തുക ഉണ്ടാക്കാന്‍ കഴിഞ്ഞില്ലെങ്കില്‍, ഗ്രൂപ്പ് തലവന്‍ അയാളെ കൊല്ലുമെന്ന് തീര്‍ച്ച യാണ്. തന്‍റെ കാമുകിക്ക് ഇത്രെയും വലിയ തുക ഉണ്ടാക്കാന്‍ കഴിയില്ല എന്നറിയാമെങ്കിലും, വേറെയാരേയും വിളിക്കാന്‍ ഇല്ലാത്തതു കൊണ്ടാണ് അയാള്‍ Lolaയെ വിളിച്ചത്. Lola സഹായിക്കാത്ത പക്ഷം, അടുത്ത് കാണുന്ന കടയില്‍ കയറി മോഷണം നടത്താനാണ് അയാളുടെ തീരുമാനം. എന്ത് തന്നെയായാലും, താന്‍ എത്തുന്നത് വരെ കാത്തിരിക്കാന്‍ Lola ആവശ്യപ്പെടുന്നു. ഇത്രയും വലിയ തുക, ഇരുപതു മിനിട്ടിനുള്ളില്‍ ഉണ്ടാക്കുക എന്നത്, Lola യെ സംബദ്ധിച്ച് നടക്കാന്‍ തീരെ സാധ്യത ഇല്ലാത്ത ഒന്നാണ്. എന്തായാലും, കാമുകനെ രക്ഷിക്കാന്‍ Lola "ഓട്ടം" തുടങ്ങുകയാണ്. സിനിമയുടെ പേര് സൂചിപ്പിക്കുന്നത് പോലെ തന്നെ Lolaയുടെ ഓട്ടമാണ് ഈ ചിത്രം. അതൊരു വെറും ഓട്ടം അല്ല. ജീവിതത്തിനു വേണ്ടിയുള്ള മരണ ഓട്ടം .....................

ചിത്രം ശ്രേദ്ധെയമാകുന്നത്, വെത്യസ്തമായ ഒരു കഥാ പശ്ചാത്തലം കൊണ്ട് മാത്രമല്ല. ഈ ചിത്രത്തിന് മൂന്നു ക്ലൈമാക്സുകള്‍ ഉണ്ടെന്നു വേണെമെങ്കില്‍ പറയാം. Lolaയുടെ മൂന്നു ഓട്ടങ്ങള്‍ ചിത്രം കാണിക്കുന്നു. വെത്യസ്തമായ ഈ മൂന്നു ഓട്ടങ്ങള്‍ക്കവസാനം, തികച്ചും വെത്യസ്തമായ മൂന്ന് "ക്ലൈമാകസുകള്‍"" പ്രേക്ഷകനെ കാത്തിരിക്കുന്നു. മികച്ച പശ്ചാത്തല സംഗീതവും, കിടയറ്റ ചിത്രീകരണവും, ഈ ചിത്രത്തെ മറക്കാന്‍ കഴിയാത്ത ചിത്രങ്ങളുടെ നിരയിലേക്ക് ഉയര്‍ത്തുന്നു. ജീവിതത്തിന്‍റെ നിശ്ചയധാര്‍ദ്ധ്യവും , ഭാഗ്യ നിര്‍ഭാഗ്യങ്ങളും എല്ലാം ഇഴചേരുന്ന, ആദ്യന്തം പ്രേക്ഷകനെ പിടിച്ചിരുത്താന്‍ കഴിയുന്ന Run Lola Run കാണാതെ പോകുന്നത് ഒരു നഷ്ട്ടം തന്നെയാണ്.

Last Train Home (Documentary-Chinese, 2009)

Director: Lixin Fan

ലോകത്തെ ഏറ്റവും വലിയ സാമ്പത്തിക ശക്തിയായി കുതിച്ചു കൊണ്ടിരിക്കുന്ന ചൈനയില്‍, വര്‍ധിച്ചു വരുന്ന സാമ്പത്തിക അസമത്വങ്ങള്‍ ചൂണ്ടിക്കാട്ടുകയാണ് Last Train Home എന്ന ഡോക്യുമെന്‍ററി. വ്യവസായ കേന്ദ്രങ്ങളായ ചൈനീസ് നഗരങ്ങളില്‍ ഏതാണ്ട് 130 million കുടിയേറ്റ തൊഴിലാളികളാണ് ജോലി ചെയ്യുന്നത്. ഗ്രാമങ്ങളില്‍ നിന്നും, നഗരങ്ങളിലേക്ക് ജോലി ചെയ്യാന്‍ എത്തിയ ഇവര്‍, വര്‍ഷത്തില്‍ ഒരിക്കല്‍, (പുതുവര്‍ഷ സമയത്ത് ) മാത്രമാണ് നാട്ടിലേക്ക് മടങ്ങി പോകുന്നത്. ആ യാത്രയാകട്ടെ ദുരിത പൂര്‍ണവും. ഈ 130 million തൊഴിലാളികളില്‍ ഒരു കുടുംബത്തിന്‍റെ ഒപ്പം സംവിധായകനും കൂട്ടരും , പലവര്‍ഷങ്ങള്‍ കൊണ്ട് നടത്തിയ യാത്രകളുടെ ആകെ തുകയാണ് Last Train Home . മറ്റു പല കുടുംബങ്ങളിലേത് പോലെ, അച്ഛനും, അമ്മയും നഗരത്തില്‍ ജോലി ചെയ്യുന്നു. മകനും, മകളും അമ്മുമ്മയ്ക്ക് ഒപ്പം നാട്ടില്‍ കഴിയുന്നു. മൂത്ത മകളുടെ ചെറു പ്രായത്തില്‍ തന്നെ, ജീവിത മാര്‍ഗം തേടി നഗരത്തില്‍ വരേണ്ടി വന്നവരാണ് ആ മാതാപിതാക്കള്‍.. . മകള്‍ക്ക് ഇപ്പോള്‍ പതിനാറു വയസ്സായിരിക്കുന്നു. ഈ പതിനാറു വര്‍ഷങ്ങളില്‍, വളരെ കുറച്ചു തവണ മാത്രമേ അവര്‍ പരസ്പരം കണ്ടിട്ടുള്ളു. എങ്കിലും മക്കള്‍ നന്നായി പഠിച്ചു രക്ഷപെടും എന്ന പ്രതീക്ഷ ആണ് ആ മാതാപിതാക്കളെ മുന്നോട്ട് നയിക്കുന്നത്. എന്നാല്‍ മകള്‍ ആകട്ടെ, പഠനം പാതി വഴിയില്‍ ഉപേക്ഷിച്ച്,  നഗരത്തില്‍ ഒരു തൊഴിലാളി ആയി ജോലി നേടുന്നു. അച്ഛനും, അമ്മയും പറയുന്നത് കേള്‍ക്കാന്‍ അവള്‍ തയാറല്ല. അങ്ങനെ പരസ്പരം മനസില്ലാക്കാന്‍ കഴിയാതെ പോകുന്ന ഒരു കുടുംബത്തിലൂടെ, തൊഴിലാളികള്‍ അനുഭവിക്കുന്ന ദുരിതങ്ങളുടെ ഒരു സാക്ഷി പറച്ചിലാണ് Last Train Home നടത്തുന്നത്.

വളരെ ആഴത്തില്‍ നമ്മെ അസ്വസ്ഥമാക്കാന്‍ കഴിയുന്നുണ്ട് ഈ ചിത്രത്തിന്. അത് കൊണ്ട് തന്നെയാണ് 2009 തില് ഏറ്റവും കൂടുതല്‍ പ്രേക്ഷകര്‍ തിരഞ്ഞെടുത്ത ചിത്രമായി Last Train Home മാറിയതും. ജീവിതത്തിന്‍റെ തീക്ഷ്ണമായ പ്രതിസന്ധികള്‍ ഒരു അലങ്കാരവും ഇല്ലാതെ, ജീവിതത്തോടൊപ്പം നടന്നു പകര്‍ത്തുകയാണ് സംവിധായകന്‍ ഇവിടെ. നിരവധി വര്‍ഷങ്ങള്‍ കൊണ്ട് പകര്‍ത്തിയ ഒരു ഡോക്യുമെന്‍ററി എന്നത് മാത്രമല്ല, കൃത്യമായ നിലപാടുകള്‍ ഉള്ള നീറുന്ന ഒരു അനുഭവം ആയി മാറാനും ഈ ചിത്രത്തിന് കഴിയുന്നു. ഒപ്പം ചൈനയുടെ പുത്തന്‍ ഭാവങ്ങളും, ഭാവഭേദങ്ങളും നന്നായി Last Train Home വരച്ചിടുന്നു.